Design for living 生活與生存

上星期五去咗演藝睇由張艾嘉, 鄭元暢, 林奕華為賣點的話劇<>．講真，套劇唔差，但係太長，三小時再加中場休息十五分鐘，有ｄ場口／配角，我覺得刪除咗個故事會更流暢，更緊湊．

我睇嗰場電視新聞話林青霞，任賢齊都有嚟睇，但我係場內場外都見唔到佢哋，可能因為我唔係買最貴嘅飛而同佢哋唔同區．好想見吓林青霞真身，睇吓佢係咪真係”不老嘅大美人”～

講番套劇，好多人話鄭元蜴今次做得好好，而我覺得佢做得好嘅原因係佢可以做番自己．佢嘅角色係一個廿歲出頭，唔明白生活意義，滿腦子問題而不知天高地厚嘅後生仔；每日番工唔知為咩，最大嘅理想係要賺好多錢，而如果你問佢點解要賺咁多錢同你打算點樣去賺咁多錢，你唯一會得到嘅答案係”唔知，未諗到”．如果你問我選角時點解會選佢，我會話有５０％原因係因為佢可以吸引更多年輕觀眾買飛入場，偶象派嘅魅力係沒法擋的，當然我無話佢唔識演戲（５０／５０囉），企喺台上要演番自己都係唔容易嘅．．．　：　）

至於張艾嘉，無可否認佢係好好戲，再加上個劇本係佢寫嘅，而個角色又好似為佢度身訂造一般，一個有ｄ年紀，不斷想向上爬，要証明自己比其他人優越，爭權奪利嘅公司高層，有咩理由會演得唔好呢！整套劇我留意到有一個”蝦碌”地方，就係當張艾嘉攞咗支紅酒出嚟想倒落個杯度，點知好死唔死支酒係無開到，好有演戲經驗嘅佢，雖然呆咗一呆，但係好快就扮倒咗酒，攞住個”吉”酒杯搖下搖下，扮無事，雖然嗰個我有笑咗出嚟．．．

全套劇我反而覺得ｄ大配角做得幾好，特別係一個叫蘇菲的配角，佢演一個工作勤奮，唔多ｓｏｃｉａｌ嘅ｆｉｎａｎｃｉａｌ人，有能力有知識，唔買身材樣貌，但最後鍾意咗個想利用佢嘅同事；因為愛，明知犯法都要幫佢；喺工作上，佢可以攞１００分，但喺感情上，佢卻係一個敗者；有幾個場口，佢喊到聲嘶力竭，俾人一巴打到飛埋一邊；但燈光一暗，十秒內，換第二個場景，佢就要若無其事咁坐番喺度；厲害！ｎｅ個角色由一個謝盈萱嘅台灣女仔飾演，佢係台北藝術大學戲劇系畢業，主修表演，之前無睇過佢任何演出，今次係第一次．其實做暗戀蘇菲嗰個木納嘅有婦之夫同嗰兩個ｃａｍ　ｃａｍ哋嘅男PA都做得唔錯．．．

講咗咁耐都無講個故事－社會嘅縮影，一間大公司同事老闆間明爭暗鬥，太過看重成敗得失嘅故事，反而我覺得佢無將<<生活與生存>>嘅大不同交代清楚．就好似林奕華喺開ｓｈｏｗ前嘅講座所講”泡麵係生存，給自己煮一餐飯係生活”，生活與生存就只差在你一念之間．

無咩睇過林奕華嘅劇，對上嗰次應該係好多年前佢搵吳彥祖做嘅<<小王子>>．

總括而言，套劇ｏｋａｙ，可能一看，但要留意－為迎合大中華市場，此劇嘅所有對白都係用普通話的～